عارفانہ کلام حمد نعت منقبت سلام
تِرا سراپا زمانے میں تمکنت میری
تِری حیات کا اک لمحہ سلطنت میری
وگرنہ لقمۂ دوزخ ہی بن گئے ہوتے
سنوار دی تِری رحمت نے عاقبت میری
میں ایک ذرۂ کم تر ہوں تیری چوکھٹ کا
خرد میں کس کے سمائے گی منزلت میری
یہی تو کافی ہے بس سایۂ لوا کے لیے
سگِ سگانِ مدینہ ہے شہریت میری
مِرا مذاق سرِ بزم خوب اڑایا گیا
کسی نے دیکھی نہیں یارو! کیفیت میری
میں خاک زادہ تو وجہِ ظہورِ کُن فیکوں
تِرے حضور نہیں کچھ بھی حیثیت میری
تِرے اک اسم کے معنی کی جستجو میں شہا
لگی ہے کتنی یہاں زیست کی لغت میری
مَیں مطمئن ہوں کسی دن درِ مقدّس پر
پڑھیں گے لوگ عطا نعت و منقبت میری
عطا اشرفی
No comments:
Post a Comment