شان در محبوب خدا اور ہی کچھ ہے

 عارفانہ کلام حمد نعت منقبت سلام

شانِ درِ محبوبِﷺ خدا اور ہی کچھ ہے

دربارِ محمدﷺ بخدا اور ہی کچھ ہے

چھائی ہوئی ہیں رحمتِ باری کی گھٹائیں

اس شہرِ محبت کی فضا اور ہی کچھ ہے

دے دیتے ہیں سائل کو زباں کھلنے سے پہلے

سرکارﷺ کا اندازِ عطا اور ہی کچھ ہے

جب ان پہ نظر پڑتی ہے یاد آتے ہیں آقا

عشاقِ محمدﷺ کی ادا اور ہی کچھ ہے

ہیں دونوں جہاں اس کی تجلّی سے منوّر

خورشیدِ نبوتﷺ کی ضیا اور ہی کچھ ہے

جابر نے کہا دیکھا جو حسنِ مہِ کامل

حسنِ شہِ لولاکﷺ لما اور ہی کچھ ہے

جنت تو جزا ہے عملِ نیک کی، لیکن

عشقِ شہِؐ طیبہ کا صِلہ اور ہی کچھ ہے

دم ٹوٹے تو انﷺ کے قدمِ ناز پہ ٹوٹے

یوں مرنے کا محمود مزا اور ہی کچھ ہے

سید ابوالفضل محمود قادری