موجۂ نور محمد میں بسائے ہوئے ہیں

 عارفانہ کلام حمد نعت منقبت

موجۂ نورِ محمدﷺ میں بسائے ہوئے ہیں

نعت کے پھول جو قرطاس پہ آئے ہوئے ہیں

کیوں نہ قربان عقیدت میں وہ ہو جائیں حضورؐ

سر پہ نعلین کی نسبت جو اٹھائے ہوئے ہیں

اک نواسے کی محبت میں کِیا سجدہ طویل

یوں مؤدت کا سبق ہم کو سکھائے ہوئے ہیں

لب پہ ہے صل علیٰﷺ نعت وظیفہ بن کر

دل میں ہم شمع عقیدت کی جلائے ہوئے ہیں

آپﷺ نے سب کو ہدایت کا خزانہ بخشا

آپﷺ اُمی ہیں مگر رب کے پڑھائے ہوئے ہیں

آج ہم کو جو میسر ہے مدینے کی گلی

دل کو ہم مطلعِ انوار بنائے ہوئے ہیں

حوضِ کوثر پہ میسر ہو شفاعت اُنؐ کی

بوجھ اپنا جو خطا کار اُٹھائے ہوئے ہیں

وہ جو چمکے تھے شبِ اسرار ستارہ بن کر

چاند سورج بھی انہیںؐ دیکھ کے گہنائے ہوئے ہیں

اُمتی ہونے کا حق کیسے ادا ہو افروز

لوگ پیغام محبت کا بھلائے ہوئے ہیں

افروز رضوی