حکمِ قضا کو کیا کہوں خوئے رضا کو کیا کروں
تیری جفا کا کیا گِلہ اپنی وفا کو کیا کروں
راہِ حیات تا عدم پیچ بہ پیچ خم بہ خم
راہنما سے کیا کہوں راہنما کو کیا کروں
صبحِ شبِ شباب تک خواہشیں خواب ہو گئیں
دستِ طلب تو رہ گیا دستِ دعا کو کیا کروں
عمر گزر رہی ہے یوں اے دلِ دردِ آشنا
جورِ بُتاں کو کیا کہوں لطفِ خدا کو کیا کروں
سلسلۂ خیال میں باندھ دیا اُمید نے
طولِ امل کے سامنے بختِ رسا کو کیا کروں
سوز و گداز شاعری دشمنِ زندگی سہی
آہ! وقار تُو ہی کہہ ذوقِ نوا کو کیا کروں
وقار انبالوی
ناظم علی
No comments:
Post a Comment