اس عالم ادراک میں جب اس کی کمی تھی

 عارفانہ کلام حمد نعت منقبت

اس عالمِ ادراک میں جب اس کی کمی تھی

وہ کیا تھا جسے چشمِ ازل ڈھونڈ رہی تھی

فاراں سے تِری ساعت آمد کوئی پوچھے

صدیوں یہ سحر نُور کے دھاروں سے دُھلی تھی

خالق تو ہے آزاد زماں اور مکاں سے

جو طُور پہ پھیلی تھی وہ پرچھائیں تِری تھی

بُلوایا گیا عالمِ امکاں سے بھی آگے

کس شان سے بندے کی مدارات ہوئی تھی

وہ وارثِ اقلیمِ جناں صاحبِ معراج

وہ جس کے لیے کرسیٔ آیات بنی تھی

وہ جس کا جگر آئینۂ لوحِ مقدس

وہ جس کی زباں طٰحٰہ و یاسیں میں ڈھلی تھی

وہ جس کا بیاں کوثر و تسنیم سے شیریں

ختم اس پہ ہی لفظوں کی تگ و تاز ہوئی تھی

اے آفریں! تجھ کو نہ سلیقہ تھا دعا کا

دربار میں آقاؐ کے بھلا کوئی کمی تھی

عشرت آفریں