عارفانہ کلام حمد نعت منقبت
ہر موج ہوا زلف پریشانِ محمدﷺ
ہے نُور سحر صورتِ خندانِ محمدﷺ
کچھ صبحِ ازل کی خبر نا شامِ ابد کی
بے خود ہوں تہِ سایۂ دامانِ محمدﷺ
تو سینہ صدیقؓ میں اک رازِ نہاں ہے
اللّٰہ رے، اے صورتِ جانانِ محمدﷺ
چُھٹ جائے اگر دامنِ کونین تو کیا غم
لیکن نہ چُھٹے ہاتھ سے دامانِ محمدﷺ
دے عرصۂ کونین میں یا رب کہیں وسعت
پھر وجد میں ہے روحِ شہیدانِ محمدﷺ
بجلی ہو، مہ و مہر ہو، یا شمعِ حرم ہو
ہے سب کے جگر میں رُخِ تابانِ محمدﷺ
اے حُسنِ ازل اپنی اداؤں کے مزے لے
ہے سامنے آئینہ حیرانِ محمدﷺ
اصغر تیرے نغموں میں بھی ہے جوش درود اب
اے بلبلِ شوریدہ بُستان محمدﷺ
اصغر گونڈوی
No comments:
Post a Comment