کِسی کتاب نہ کاغذ نہ ہی قلم سے ہوا
ہمارے غم کا مداوا تمہارے غم سے ہوا
جہاں میں آئے تو رونے لگے غنیمت سے
یہ کارِ زیست تھا، آغاز ہی جنم سے ہوا
کسی کی دِید نے حالت سنوار کر رکھ دی
ہمارے زخم کا مرہم بھی چشمِ نم سے ہوا
زمانہ کیسے سمجھ پائے گا مگر یہ کمال
جو میرے حیدرِ کرارؑ کے عَلم سے ہوا
ہمارے سلسلے ملتے ہیں قیسِ دوراں سے
یہ شہر دشت ہوا ہے اگر تو ہم سے ہوا
مدینہ پاک کی گلیوں کو بھی نصیب عروج
مِرے عظیم پیغمبرﷺ تِرے قدم سے ہوا
ہمارے دَم سے خزاؤں نے رُخ بدل ڈالا
یہ گھر بہاروں میں آباد اپنے دَم سے ہوا
حسنین قاسمی
No comments:
Post a Comment