ہمارے دل پہ تمہاری اجارہ داری ہے
مِری یہ زندگی اب زندگی تمہاری ہے
ہوا کے دوش پہ لاتی ہے یہ پیام تِرا
اسی لیے تو بادِ صبا سے یاری ہے
گزرتی تم پہ قیامت تو جان لیتے تم
وہ رات تیرے بِنا ہم نے جو گزاری ہے
بنامِ عشق اسی کھیل میں مِرے ہمدم
انا کی کون سی بازی نہیں جو ہاری ہے
یہ جس کے ہاتھ میں رہتی ہے ڈور تیری صدا
اے کٹھ کے پُتلے! بتا کون یہ مداری ہے؟
کوئی بھی خوف نہیں آج مجھ کو خطرے کا
نظر جو ماں نے مِری آج ہی اتاری ہے
ہمارے بعد بھی چلتی رہے گی یہ دنیا
قبا یہ زیست کی یوں سوچ کر اتاری ہے
پڑی تھی دُھول کتابوں پہ وقت کی ایسے
کوئی بتائے ہمیں ایسی کیا بے زاری ہے
نشہ ہے روح تلک ان غزال آنکھوں کا
وہ ایک گھونٹ کہ جس کی ہمیں خماری ہے
یہ بیل اب نہ چڑھے گی منڈیر پر کس طور
جو باغبان کے ہاتھوں میں ہی کٹاری ہے
اسے نصیب ہوں خوشیاں مِری دعا ہے سہیل
ہمیں قبول غموں کی یہی پٹاری ہے
خرم سہیل
No comments:
Post a Comment