لالۂ خوش رنگ تھا جان چمن کیا ہو گیا

 لالۂ خُوشرنگ تھا جانِ چمن کیا ہو گیا

جلوۂ شمعِ شبستاں چمن کیا ہو گیا

کیا ہوئی وہ نرگسِ شہلا کی چشمِ سُرمہ سا

دیدۂ شوخِ غزالانِ چمن کیا ہو گیا

سُنبلِ سیراب کا کیا ہو گیا وہ پیچ و تاب

گیسوئے مرغولہ مویانِ چمن کیا ہو گیا

اے صبا نشو و نمائے غنچہ و گُل کیا ہوئی

آب و رنگِ خوب رُویانِ چمن کیا ہو گیا

اپنے موقع پر نظر آتا نہیں کوئی نہال

انتظامِ نخلِ بندانِ چمن کیا ہو گیا

جس کو دیکھو بے اجازت اب وہ رکھتا ہے قدم

بندوبستِ اہلِ کاروانِ چمن کیا ہو گیا

کون سے ناواقفوں نے کاٹ ڈالا سَرو کو

مصرعِ موزونِ دیوانِ چمن کیا ہو گیا

غنچہ و گُل، یار و ساقی، شیشہ و جامِ شراب

اے وحیدﷺ اپنا وہ سامانِ چمن کیا ہو گیا

وحید الہ آبادی

وحیدالدین احمد