سب ہی گمشدہ ہیں
ترازو لیے ہاتھ میں سارے منصف
خدا
بندگانِ اطاعت
رعیت حکومت
کہیں کھو گئے ہیں
کسی کو خبر تک نہیں
سارے در ہیں مقفّل
صدا ہے نہ منظر
مکافاتِ قول و عمل کی حقیقت
نہ انساں نہ انسانیت کی دھائی
تعلق نہ دعوائے فریادِ دل کی رسائی
سب ہی گمشدہ ہیں
کہیں کوئی موجود ہے تو وہ اک بے بسی کی صدا ہے
خود اپنی گواہی
تلاش ایک بے انت لمبا سفر
فاصلے
دور تک پھیلتا اک خلا
درد آنسو
یہ کیا ہوگیا ہے
کہ جب سے اٹھائے گئے لوگ آسیب ہے ہر طرف
خامشی ہے
ترازو لیے ہاتھ میں سارے منصف
خدا
بندگانِ اطاعت
رعیت حکومت
کہاں کھو گئے ہیں؟
کہیں کوئی موجود ہے تو وہ اک بے بسی کی صدا ہے
خود اپنی گواہی
ناز بارکزئی
No comments:
Post a Comment