تری راہ میں جو فنا ہوئے کہوں کیا جو ان کا مقام ہے

 تِری راہ میں جو فنا ہوئے کہوں کیا جو ان کا مقام ہے

نہ یہ آسمان ہے نہ یہ زمیں نہ یہ صبح ہے نہ یہ شام ہے

تمہیں علم کچھ جو ہو عالمو! تو بتا دو مجھ کو نہ چپ رہو

کہ شرابِ عشق کا مست ہوں، یہ حلال ہے کہ حرام ہے؟

کبھی گِرد یار کے گھومنا، کبھی دیکھ دیکھ کے جھومنا

یہی حیرتی کا ہے مشغلہ یہی دُھن ہے اور یہی کام ہے

کبھی سیرِ مسجدِ عشق کر، تو پتا ملے تجھے بے خبر

جو امام ہے وہی مقتدی،، جو ہے مقتدی وہ امام ہے

کبھی گُل میں ہے کبھی خار میں کبھی برگ میں کبھی بار میں

کبھی دَیر میں کبھی عرش پر، کبھی روبرو سرِ بام ہے

کبھی جُستجو کبھی غور ہے، یہ نمازِ عشق کا طور ہے

نہ رکوع ہے نہ سجود ہے،۔ نہ قیام ہے نہ سلام ہے

تجھے عرش جس کی ہے جُستجو جسے ڈھونڈتا ہے تُو کو بہ کو

کبھی دل میں ہے وہ چُھپا ہوا،۔ کبھی رُوشناسِ عوام ہے

عرش گیاوی