گاہے ادھر کی فکر ہے گاہے ادھر کی ہے

 گاہے اِدھر کی فکر ہے گاہے اُدھر کی ہے 

مٹی غرض خراب جہاں میں بشر کی ہے 

معصوم کو بھی نزع ہے ہرگز نہیں مفر 

مظلوم کی دعا کو بھی حاجت اثر کی ہے 

چوٹی میں اور جُوڑے میں ظالم کے فرق ہے 

یہ راہ عمر بھر کی ہے وہ سال بھر کی ہے 

گل گیر کا خطر تو پتنگوں کی ہے خلش 

آفت میں جان شام سے شمع سحر کی ہے 

اُجڑی پڑی ہیں تُربتیں شاہانِ دہر کی 

پھولوں کی چادریں ہیں نہ بتی اگر کی ہے 

ہوتا ہے زندگی کا کوئی دم میں فیصلہ 

دن بھر کی بات ہے نہ پہر دو پہر کی ہے 

قدرت تو چار سُو تِری روشن ہے دہر میں 

حاجت نہ شمس کی نہ ضرورت قمر کی ہے 

قاتل وہ شاخ ہے تِری یہ تیغِ آبدار 

جس کو نہ گل کا غم ہے نہ حاجت ثمر کی ہے 

سب کچھ خدا نے مجھ کو دیا عرش بے طلب 

دختر کی آرزو، نہ تمنا پسر کی ہے 

اے عرش آؤ خاک میں دلی کے سو رہیں 

مٹ کر بھی خوابگاہ یہ اہلِ ہنر کی ہے 

عرش گیاوی