اپنی منزل اسے آشیاں بھی لکھوں

 عارفانہ کلام حمد نعت منقبت

اپنی منزل اسے، آشیاں بھی لکھوں

میں مدینے کو دارِ اماں بھی لکھوں

آپﷺ کو رب کا رازِ نہاں بھی لکھوں

جاوداں، محرم و رازداں بھی لکھوں

ہاں سراپا انہیں مہرباں بھی لکھوں

میں انہیں رحمتِ بے کراں بھی لکھوں

عمر بھر نعت شہؐ کی یہاں بھی لکھوں

کاش مدح و ثناء میں وہاں بھی لکھوں

روشنی، نور کا آستاں بھی لکھوں

روضۂ شہؐ کو جنت نشاں بھی لکھوں

نازشِ کُل، شہؐ دو جہاں بھی لکھوں

ان کو روحِ رواں، حفظِ جاں بھی لکھوں

مثلِ شاہِ زمنﷺ دہر میں ہے کہاں

سب پہ ظاہر کروں یہ عیاں بھی لکھوں

میں لکھوں اپنی آنکھوں کا سُرمہ اسے

خاکِ دہلیز کو حرزِ جاں بھی لکھوں

ذوق افزا ثناء ہے شہا آپﷺ کی

دل کی گہرائیوں سے جہاں بھی لکھوں

آپؐ کے شہر کے ذرے ذرے کو میں

آفتاب و قمر، کہکشاں، بھی لکھوں

علم و عرفاں کا مخزن نگر آپﷺ کا

نکہت و نور کا آشیاں بھی لکھوں

ان کی مدح میں زینب ہے بےحد اثر

میں اسے روشنی کا جہاں بھی لکھوں

سیدہ زینب سروری قادری