حسین ابن علی دنیا کو حیراں کر دیا تو نے

 عارفانہ کلام حمد نعت منقبت سلام

حسینؑ ابنِ علیؑ دنیا کو حیراں کر دیا تُوؑ نے​

سرابِ تشنگی کو آبِ حیواں کر دیا تو نے​

نظر ڈالی تو ذروں کو جواہر میں بدل ڈالا​

قدم رکھا تو شعلوں کو گُلستاں کر دیا تو نے​

تِریؑ کشتئ جاں کو غرق کرنے جب بڑھا طوفاں​

تو خود طوفاں کو غرقِ کشتئ جاں کر دیا تو نے

​ضمیرِ اہلِ وحشت اور ذاتِ اہلِ وحشت کو​

بہم پیچیدہ و دست و گریباں کر دیا تو نے​

حراحت کو عطا کر کے شعارِ بخیہ و مرہم​

خزاں کو ضامنِ رنگِ بہاراں کر دیا تو نے​

جو دُھندلا ہو چلا پہلا ورق منشورِ فطرت کا​

تو اپنے خونِ دل کو زیبِ عنواں کر دیا تو نے​

بُجھی جب شمعِ جاں تو زیرِ موجِ دُودِ پُر افشاں​

حقائق کو چراغِ زیرِ داماں کر دیا تو نے​

بنا کر شمعِ طور اپنے لہو کے گرم قطروں کو​

دیارِ ذہنِ عالم میں چراغاں کر دیا تو نے​

بقاء کے آسماں پر اک صباحِ نو دمک اٹھی​

زمیں پر چاک جب اپنا گریباں کر دیا تو نے​

رہے گا یہ تِرا احسان سرکارِ مشیت پر​

کہ اے ابنِ علیؑ انساں کو انساں کر دیا تو نے​

کمانِ بے نوا کس طرح کڑکے فرقِ سلطاں پر​

بنی آدم کی اس مشکل کو آساں کر دیا تو نے​

بنا کر بات، پیغمبر کو بھی پیغمبری بخشی​

چھڑک کر خون پھر قرآں کو قرآں کر دیا​

نظر اٹھتی ہے سُوئے جوش تو حیرت یہ ہوتی ہے​

کہ اس کافر کو اے مولا مسلماں کر دیا تو نے​

​

جوش ملیح آبادی