گلی پڑی تھی کہیں راستہ پڑا ہوا تھا

 گلی پڑی تھی کہیں راستہ پڑا ہوا تھا

دلوں کے بیچ عجب فاصلہ پڑا ہوا تھا

اُلجھ رہا تھا بھنور جب ہماری ناؤ کے ساتھ

بہت قریب کوئی آسرا پڑا ہوا تھا

سُلگتی شام تھی صحرا تھا جلتے خیمے تھے

قریب خیموں کے دستِ دُعا پڑا ہوا تھا

درِ نصیب پہ پہنچا تو بد نصیبی سے

مِرے نصیب کا اک حادثہ پڑا ہوا تھا

مِلا نہیں ہے اُسے ڈھونڈ ڈھونڈ تھک گیا میں

مِری دراز میں جو قہقہہ پڑا ہوا تھا

میں اپنا چہرہ کہیں رکھ کے بُھول آیا مگر

مری تلاش میں اک آئینہ پڑا ہوا تھا

بُجھے ستارے تھے صحرا تھا اور وحشت تھی

کنارِ آب کے جلتا دِیا پڑا ہوا تھا

نجانے خواب میں کس نے چُھوا مجھے حیدر

کُھلی جب آنکھ تو میں گُل نما پڑا ہوا تھا

علیم حیدر