ہر نظر آج برملا تو اٹھی

 ہر نظر آج برملا تو اٹھی

تہمتِ عرضِ مدعا تو اٹھی

مسجدوں پر سکوت طاری تھا

میکدے سے کوئی صدا تو اٹھی

ان کے شانوں پہ زلف لہرائی

ہو کہ بارش نہ ہو، گھٹا تو اٹھی

اٹھ نہ سکتی نقابِ چہرۂ زیست

ہم نے دل اپنا خون کیا تو اٹھی

مسکرائیں نہ مسکرائیں پھول 

بندشِ منتِ صبا تو اٹھی

دل پہ قابو رہے رہے نہ رہے

نگہِ صبر آزما تو اٹھی

نذرِ غم ہو گیا بہار تو کیا

رسمِ پارینۂ وفا تو اٹھی

بہار کوٹی