وہ یہیں ہے شہر میں ٹھہرا ہوا

 وہ یہیں ہے شہر میں ٹھہرا ہُوا

زخم دل کا اور بھی گہرا ہوا

میں وفا کی آنکھ سے ٹپکا ہوا

ایک آنسو جو بہت رُسوا ہوا

مُدتیں گُزریں اُسے بچھڑے ہوئے

لمحہ لمحہ پھر بھی ہے چونکا ہوا

اجنبی تُو بھی پرائے دیس میں

میں بھی اپنے شہر میں بھٹکا ہوا

پیار بھی ہوتا ہے کیا مجبور کا

ایک وعدہ ریت پہ لکھا ہوا

پر جھٹک کے ہو گیا ہے تازہ دم 

اک پرندہ قید سے چُھوٹا ہوا

میں سمندر کی طرح خاموش ہوں

وہ مگر دریا ہے اک دہکا ہوا

میں کسی مُفلس کے در کی دُھول ہوں

وہ بھی اک پتھر بہت پُوجا ہوا

اک تِری دیوانگی منصور کیا

اس گلی میں ہر کوئی رُسوا ہوا 

منصور اعجاز