عارفانہ کلام حمد نعت منقبت
عہد نبیﷺ میں
شہر نبیﷺ کا
کاش میں ذرّہ ہوتا
انؐ کے پیروں کو میں چُھوتا
اور انؐ کے قدموں میں رُلتا
مجھ کو اُڑاتی بادِ رحمت
انؐ کی کملی سے میں لِپٹتا
پُھونک سے جب وہ مجھ کو اُڑاتے
خوشی سے میں پھر پُھول ہی جاتا
کاش میں ذرّہ ہوتا
عہد نبیﷺ میں
شہر نبیﷺ کا
کاش میں تنکا ہوتا
انؐ کے بہاریں قدم جو پڑتے
تو میں برگِ گُل بن جاتا
خوشبوؤں سے خوب مہکتا
انؐ کی راہ میں بِچھ جانے کو
دوش ہوا پر اُڑتا پِھرتا
شاید کبھی وہ مجھ کو اُٹھائیں
سطح زمیں سے اُٹھ کر رہتا
کاش میں تنکا ہوتا
عہد نبیﷺ میں
شہر نبیﷺ کا
کاش میں جھونکا ہوتا
ہوا کا جھونکا، صبا کا موجہ
انؐ کے سانس جو مجھ میں گھُلتے
جنت کی پُروا میں بنتا
لمس جو انؐ کے رخ سے ہوتا
نُور کی چادر میں بن جاتا
تپتی ہوئی روحوں کے اندر
عشق نبیﷺ کے پُھول کھلاتا
کاش میں جھونکا ہوتا
عہد نبیﷺ میں
شہر نبیﷺ کا
کاش میں قطرہ ہوتا
مینہ کا قطرہ
رُوئے مبارکؐ پر جو پڑتا
اپنے آپ کو پھر میں دھوتا
اور جو فرشِ زمیں پر گِرتا
اک گوہر بن جاتا
اشک کا قطرہ
دیکھ کے انؐ کی صورت پیاری
اشکِ مسرّت میں بن جاتا
دھو دھو کر آنکھوں کو سجاتا
عکسِ جنت میں ہو جاتا
وہؐ نظروں سے اوجھل ہوتے
اشکِ غم بن کر میں بہتا
ہجر کی کالی رات جو آتی
دِیے کی صُورت جلتا
کاش میں قطرہ ہوتا
سوچتا ہوں لیکن یارو
ذرے، تنکے، جھونکے اور قطرے سے بڑھ کر
عہدِ نبیﷺ میں
شہرِ نبیﷺ کا
کاش میں انساں ہوتا
اور مسلماں ہوتا
کٹ مرتا میں حکمِ نبیﷺ پر
راہِ دینِ حق میں
پائے نبیﷺ پر سر رکھ کر میں موت کی لذت پاتا
اور امر ہو جاتا
لالۂ صحرائی
چوہدری محمد صادق
No comments:
Post a Comment