سسرال میں جو میکے سے آتی ہیں بیویاں

 زعفرانی کلام

بیویاں

سسرال میں جو میکے سے آتی ہیں بیویاں

سو سو طرح سے دُھوم مچاتی ہیں بیویاں

کھانے مزے مزے کے کھلاتی ہیں بیویاں

جینے کا جو مزا ہے چکھاتی ہیں بیویاں

کچھ دن تو خوب عیش کراتی ہیں بیویاں

پھر اس کے بعد خون رُلاتی ہیں بیویاں

چھوڑے کسی نے بال ہیں بیوی کے واسطے

کچھ جمع کرتے ہیں مال بیوی کے واسطے

کچھ رات دن نِڈھال ہیں بیوی کے واسطے

پالے یہ سب وبال ہیں بیوی کے واسطے

اتنے جتن سے گھر میں جو آتی ہیں بیویاں

چودہ طبق میاں کو دکھاتی ہیں بیویاں

کچھ لوگ تو نہال ہیں بیگم کے ہاتھ سے

پاتے ہر اک وبال ہیں بیگم کے ہاتھ سے

کچھ مست جذب و حال ہیں بیگم کے ہاتھ سے

آخر میں سب حلال ہیں بیگم کے ہاتھ سے

بچوں کے ”چوکے“ پہلے اُڑاتی ہیں بیویاں

پھر شوہروں کے چھکے چھڑاتی ہیں بیویاں

کہتی ہے بیوی اس کو مجازی ہے تُو خدا

آقا ہے تُو، سوامی ہے، سرتاج ہے مِرا

پھر رفتہ رفتہ اس کا گھٹاتی ہیں مرتبہ

کرتی ہیں انتہا میں خصم کا لقب عطا

مردوں کو ”بودم“ ایسا بناتی ہیں بیویاں

سر پہ چڑھا کے قدموں میں لاتی ہیں بیویاں

یہ لائیے، دلائیے اور وہ منگائیے

اس وقت آپ جائیے، اس وقت آئیے

یہ شے جو کھائی آپ نے یہ شے نہ کھائیے

ملیے نہ ان سے آپ نہ ان کو بلائیے

مردوں پہ حکم ایسے چلاتی ہیں بیویاں

افسر کو بھی غلام بناتی ہیں بیویاں

شیرانِ نر ہیں ایک سے اک مرد ہیں جری

رہتی ہے جن کے خوف سے دنیا ڈری ڈری

کہتے ہیں مسٹر آپ کی یہ بات ہے کھری

رکھا قدم جو گھر میں طبیعت ہوئی مری

روباہ شیر نر کو بناتی ہیں بیویاں

پھر دھاڑنا بھی اس کو چُھڑاتی ہیں بیویاں

مسٹر دہلوی