جو روشن طور پر تھا وہ تجلی دل میں رکھتے ہیں

 عارفانہ کلام حمد نعت منقبت

جو روشن طور پر تھا وہ تجلّی دل میں رکھتے ہیں

رسول اللہﷺ کا نقشِ کفِ پا دل میں رکھتے ہیں

سمائی ہے محبت سرورِ کونینﷺ کی اس میں

کہاں ہم فکرِ دِیں اور فکرِ دنیا دل میں رکھتے ہیں

یہی جینے کا باعث ہے تمہارے نا مُرادوں کے

کہ پوشیدہ تمہاری یاد آقاﷺ دل میں رکھتے ہیں

ہماری خاک کو تُو اے صبا! طیبہ میں پہنچانا

کہ ہم پا بوسئ شہﷺ کی تمنا دل میں رکھتے ہیں

شہِ دیںؐ مہرباں ہو کر ہوئے مسکن گزیں اس میں

جمیلہ! آج ہم عرشِ معلیٰ دل میں رکھتے ہیں

راضیہ جمیلہ خاتون