عارفانہ کلام حمد نعت منقبت
خواہش نہیں ذرا بھی مجھے نام وام کی
میرے قلم کو پیاس ہے کوثر کے جام کی
یہ دل کہ جس میں پیار بسا ہے حضورؐ کا
اِک چیز بس یہی ہے مِرے پاس کام کی
پیغامِ شاہِ دیںﷺ کی محتاج کائنات
رحمت ہے سب کے واسطے اُنؐ کے پیام کی
دیوانہ وار ہر گھڑی شیدائے مصطفیٰﷺ
بس رٹ لگائے رہتے ہیں آقاﷺ کے نام کی
انسان کے حقوق و فرائض عیاں کیے
تعلیمِ عدل آپﷺ نے دنیا میں عام کی
تاریخ ہے گواہ کہ خیرالانامﷺ نے
تفریق جڑ سے ختم کی آقا، غلام کی
قول و عمل حضور کے قرآں کے ترجماں
تشریح اُنﷺ کی ذات خدا کے کلام کی
بس یہ کہ اُنﷺ سا ہو گا کوئی اور نہ ہو سکا
کیا خوب ذاتِ پاک ہے خیرالانامﷺ کی
اہلِ فلک گواہ کہ سارے جہاں میں
خوشبو رچی بسی ہے درود و سلام کی
راغب ہر ایک نعت ہے نذرانۂ خلوص
توصیف کب رقم ہوئی ہے عالی مقامؐ کی
افتخار راغب
No comments:
Post a Comment