کوئی تو رہتا ہے میرا اس طرف

 ہر قدم اُٹھتا ہے سیدھا اُس طرف

کوئی تو رہتا ہے میرا اس طرف

آدھا دریا ساتھ چلتا ہے مِرے

اور باقی آدھا دریا اس طرف

پُھول رکھنا اس کے قدموں میں صبا

جو بھی رہتا ہے ہمارا اس طرف

ان سے کہنا کوئی ان کا ہے یہاں  

اے ہوا! تُو جب بھی جانا اس طرف

چُوڑیوں کے کھنکنانے کی صدا

روز کرتی ہوں روانہ اس طرف

 ہم پریشاں ہیں اِدھر اُن کے لیے

حال کچھ ایسا ہی ہو گا اس طرف

میرے دل تک روشنی آتی رہی

یوں دِیا اس نے جلایا اس طرف

کیا کروں اٹھکیلیاں میں عندلیب

جب ہے میرا باغ سارا اس طرف

عندلیب راٹھور