عارفانہ کلام حمد نعت منقبت
جو ذرے ملے مجھ کو مدینے کے سفر میں
چُن چُن کے وہ سب رکھ لیے دامانِ نظر میں
بیٹھا ہوں لیے درد محمدﷺ کا جگر میں
اللہ کی رحمت سے ہے سب کچھ مِرے گھر میں
فردوس کے منظر میں، نہ وہ نورِ قمر میں
انوار بھرے ہیں جو مدینے کی سحر میں
اُڑنے کی نہ طاقت رہی، جبریلؑ کے پر میں
ایسا بھی مقام آیا تیریﷺ راہگزر میں
دھارے سے برسنے لگے میزابِ کرم کے
جب اشک اُمڈ آئے میرے دیدۂ تر میں
جلوہ ہے میرے سامنے معراجِ دنیٰ کا
اک صاحبِ ما زاغ کا سُرمہ ہے نظر میں
اک حُسنِ ازل، حُسنِ نظر، حُسنِ حقیقت
دیکھا ہے تیرےؐ روضے کی دیوار میں در میں
میدانِ قیامت میں ہے ایک ایک گُنہ گار
رحمت کی قسم! رحمتِ عالمﷺ کی نظر میں
اب چھوڑ دے کشتی کو ہلال انؐ کے کرم پر
وہؐ چاہیں تو ساحل ابھی بن جانے بھنور میں
ہلال جعفری
No comments:
Post a Comment