تڑپتے دل کو کافی ہے بس اتنا واہمہ رکھنا
بچھڑنے والا لوٹے گا ہمیشہ حوصلہ رکھنا
چلے جائیں گے ہم بھی دوستو دُنیائے فانی سے
فقط اتنی گُزارش ہے، دُعا کا سلسلہ رکھنا
کہ ہم بدبخت لوگوں میں بس اک یہ ہی بُرائی ہے
دُعائیں دیر سے لگتی ہیں جانی حوصلہ رکھنا
تمہیں خُوشیاں مبارک ہوں ہمارے غم زیادہ ہیں
تمہیں تلقین ہے اتنی کہ ہم سے فاصلہ رکھنا
کہ پانی جتنا گدلا ہو بُجھا دیتا ہے آتش کو
ہمارے جیسوں سے بھی یار تھوڑا واسطہ رکھنا
بچھڑ کر تم کہِیں مِلنا تو ہنس کر بات کر لینا
بجُز اس کے نہیں کوئی ہمیں بھی رابطہ رکھنا
عظیم کامل
No comments:
Post a Comment