عارفانہ کلام حمد نعت منقبت
حضورؐ وصل نے مستی میں لالہ زاری کی
حضورؐ ہجر نے اس بار اشک باری کی
حضورؐ آہِ دریدہ کی لاج رکھ لیجے
حضورؐ رات کٹھن ہے یہ انتظاری کی
حضورؐ اب تو مدینہ بنے مِرا مسکن
حضورؐ بات ہے اب میری بیقراری کی
حضورؐ آپﷺ کو زیبا ہے اسوۂ عالی
حضورؐ فقر کے عالم میں تاجداری کی
حضورؐ آپ سے روشن ہے حسن کا چہرہ
حضورؐ آپ سے یوسف نے حسن باری کی
حضورؐ آپ سے پودے اخوتوں کے بحال
حضورؐ آپ کی سیرت نے گل نگاری کی
حضورؐ آپﷺ کا شیوہ ہے پُرسشِ اُمت
حضورؐ آپ نے اُمت کی غمگساری کی
حضورؐ اس کو میسر ہو پہلوئے صدیقؓ
حضورؐ آپ پہ جس نے بھی جاں نثاری کی
حضورؐ آپ پہ افشا رموزِ کون و مکاں
حضورؐ آپ سے خالق نے راز داری کی
حضورؐ آپﷺ کا نقشِ قدم جمالِ خودی
حضورؐ خضرؑ نے اس رہ کی پاسداری کی
حضورؐ حسنِ تکلم عطا ہو مجھ کو بھی
حضورؐ بات کروں میں بھی چار یاری کی
حضورؐ آپ کی مدحت کہاں نصیبہ کہاں
حضورؐ آپ سے حرفوں نے بات ساری کی
حضورؐ آپﷺ کے دیدار کی تمنا لیے
حضورؐ آپ کے روضے پہ شب گزاری کی
عطا اشرفی
No comments:
Post a Comment