کہیں سے ابتدا کر دیں کہیں پر انتہا کر دیں

 عارفانہ کلام حمد نعت منقبت

کہیں سے ابتداء کر دیں کہیں پر انتہا کر دیں

اب انؐ پر ہے وہ جو کر دیں بھلا کر دیں بُرا کر دیں 

تو ان سے مل یہ ایسے ہیں کہ پہلے تو خدا کر دیں

پھر اس کے بعد رُسوا کر، یہی خُود سے جدا کر دیں

نشے میں ہیں یہ کثرت کے کہ کثرت اُن کی طاقت ہے

نشے میں چُور لوگوں کو بھی ہم درد آشنا کر دیں

ہرا محبوب ہے ان کو، ہرے کے ہم بھی عاشق ہیں

انہیں کہنا نہ بھر پائے وہ زخمِ دل ہرا کر دیں

انہیں معلوم ہے عشّاق ہیں، مجذوب، دیوانے

جہاں چاہیں بٹھا دیں اور جہاں چاہیں کھڑا کر دیں

ہیں یک طرفہ محبت کے تھکے ہارے، ہم ایسے ہیں

جو ہم کو دو وہ ہم تم کو بہت حصے بڑھا کر دیں

عصا کی ساری تاثیریں ہیں ان کے ہاتھ میں  احسن 

کہیں چشمے رواں کر دیں کہیں پھر اژدھا کر دیں

احسن خلیل