جگنو کو رکھ کے ہاتھ پہ در در پِھرا ہوں میں
یہ کس کی آرزو ہے کہ شب بھر پھرا ہوں میں
یوں تو اندھیری رات میں اکثر پھرا ہوں میں
آنکھوں میں لےکے صبح کا منظر پھرا ہوں میں
تھوڑی سی پیاس سُوکھے لبوں پر لیے ہوئے
وقتِ ازل سے گِرد سمندر پھرا ہوں میں
پُرکھوں کی پارسائی میرے کام آ گئی
میخانے کے قریب پہونچ کر پھرا ہوں میں
اس طرح ٹھوکروں میں گُزاری حیات نو
بن کے تمہاری راہ کا پتھر پھرا ہوں میں
تنہا کسی مقام سے گُزرا نہیں کبھی
ہمراہ لےکے یادوں کے لشکر پھرا ہوں میں
انجم بس اتنا سوچ کے لب میں نے سی لیے
شاید کہ کائنات میں اک سر پھرا ہوں میں
انجم لکھنوی
No comments:
Post a Comment