عارفانہ کلام حمد نعت منقبت
طوافِ گنبدِ خضریٰ جو راس آیا مدینے میں
نظر نے اک سرورِ جاوداں پایا مدینے میں
یہاں سب کچھ بقدرِ وسعتِ اُمید ملتا ہے
سوالی بن کے جس نے ہاتھ پھیلایا مدینے میں
بہر لمحہ بہر لحظہ بہر جلوہ بہر عنواں
زمیں پر خُلد کا عالم نظر آیا مدینے میں
وہی جلوؤں کی تابانی وہی رنگوں کی ارزانی
کسی کو کب خیالِ بیش و کم آیا مدینے میں
یہاں کے دشت بھی گلزارِ جنت بن گئے آخر
بہاروں نے خزاں کو تاج پہنایا مدینے میں
متاعِ زندگی کی قدر و قیمت پوچھئے اُن سے
لٹا آئے جو اپنی جاں کا سرمایہ مدینے میں
بڑھا دی عرش کی رفعت سے رفعت خاکِ طیبہ کی
رسول پاکﷺ نے آرام فرمایا مدینے میں
وہ اب ہر نعمت کونین بے وقعت سمجھتا ہے
حبیب کبریاﷺ نے جس کو بلوایا مدینے میں
کسی کو یاد بھی آئی نہ عارف گرمئ محشر
سروں پر تھا پَرِ جبریلؑ کا سایہ مدینے میں
عارف اکبرآبادی
No comments:
Post a Comment