ترا نام ہے محمد تری بزم آسماں ہے

 عارفانہ کلام حمد نعت منقبت

تِرا نام ہے محمدﷺ تِری بزم آسماں ہے

مِرا گھر زمیں کے اوپر تِری راہ کہکشاں ہے

تُو ہے اوّل اور آخر، تُو شفیعِ روزِ محشر

ہے میرا وجود فانی تُو حیات جاں وِداں ہے

مجھے کملی میں چُھپا لے کہ اے کالی کملی والے

تُو سراپا نُورِ وحدت میری زندگی دُھواں ہے

جسے مِل گئے محمدﷺ اسے مِل گیا خُدا بھی

کہ احد میں اور احمدﷺ میں یہ میم درمیاں ہے

تِری ذات پاک اعلیٰ، تُو ہے فیض کا سمندر

تُو کرم کا ہے خزینہ، تُو سکون قلب و جاں ہے

تِری شانِ بے نیازی نہ کوئی سمجھ سکے گا

مجھے ناز ہے تو یہ ہے کہ تُو مجھ پہ مہرباں ہے

جسے کہتے ہیں مدینہ وہ تِری نظر میں دلکش

ہے تِرے لیے مدینہ، مِرے واسطے جناں ہے

مصطفیٰ دلکش