خوب تصویر ملے گی میرے کُرتے سے تمہیں
صنفِ کشمیر ملے گی میرے کُرتے سے تمہیں
روز کرتا تھا میں کشمیر کے دُکھ کا ماتم
سُرخ زنجیر ملے گی میرے کُرتے سے تمہیں
بھیجا کرتی تھی وہ اُس پار سے پُر اشک خطوط
جن کی تشہیر ملے گی میرے کُرتے سے تمہیں
تھے رفوگر میرے دامن کے میری ماں کے وہ ہاتھ
خاص تاثیر ملے گی میرے کُرتے سے تمہیں
ثبت ہے نوک پہ بُرہان کی گردن کا وہ دُکھ
کُند شمشیر ملے گی میرے کُرتے سے تمہیں
جیب میں رکھی تھی وہ پیروں تلے روندنے کو
سازشِ میر ملے گی میرے کُرتے سے تمہیں
اور لدّاخ سے یوسف کے قبیلے والی
وقت کی ہیر ملے گی میرے کُرتے سے تمہیں
آہ! مقبول کا زخموں سے وہ چھلنی کُرتا
اُس کی تشہیر ملے گی میرے کُرتے سے تمہیں
کُن کا حاصل جو ہوا آدم و جنت کا تضاد
اُس کی تفسیر ملے گی میرے کُرتے سے تمہیں
جیسے اک ماں نے بھی حُجّاج کو لکھی تھی شہاب
ایک تحریر ملے گی میرے کُرتے سے تمہیں
خواجہ شہاب الدین
No comments:
Post a Comment