نہیں ہے دین مکمل اگر امام نہیں

 عارفانہ کلام حمد نعت منقبت

نہیں ہے دین مکمل اگر امام نہیں

وہ اور کچھ ہے مگر نعمت تمام نہیں

حدیث ہے یہ نبیؐ کی کلام عام نہیں

جو ہو مخالف قرآں مِرا کلام نہیں

اداے حق بیاں ہو زباں کا کام نہیں

یہ ذکر آلؑ محمدﷺ ہے ذکر عام نہیں

ہوا ہے دن کے اجالے میں جب سے یہ اندھیرا

غم حسینؑ کی دنیا میں صبح و شام نہیں

سجی ہے کس کے لیے محفل مہ و انجم

زمانہ کیسے ہے قائم اگر امام نہیں

ہے العطش کی صدا آج تک فضاؤں میں

حسینؑ! آپ سا کوئی بھی تشنہ کام نہیں

نبیﷺ کا معجزہ قدرت کا شاہکار جمیل

جسے سمجھ لیں بشر وہ ترا مقام نہیں

حسینؑ نیر برج رسالتﷺ و وحدت

جو سامنے ہو تو دنیائے دیں میں شام نہیں

دلوں کا زخم بنا دے ہلا دے کون و مکاں

وہ اک تبسم معصوم ہے حسام نہیں

یزیدیت ابھی دل کو سیاہ کردے گی

حسینیت کا اگر گوش زد پیام نہیں

یہ فتح دیں الٰہی کی ہے صدا پیہم

جواب سبط نبی سلطنت کا کام نہیں

جو تشنگی سے مرتب کرے حیات دوام

حسینؑ جیسا کوئی قادر نظام نہیں

یہ ابن ساقئ کوثر کا مے کدہ ہے نثار

یہاں شراب برستی ہے اور جام نہیں

نثار بیانوی

نثار جعفری