عارفانہ کلام حمد نعت منقبت
ہم کو محبوب ہے ہر ایک ادا آقاؐ کی
ایسے ہوتی ہے دیوانوں پہ عطا آقا کی
تیری توفیق سے لیتے ہیں تِرا نام خدا
تیری توفيق سے کرتے ہیں ثنا آقا کی
ناز پھر کیوں نہ کریں ہم کہ عمرؓ والے ہیں
جس کو اسلام میں لائی ہے دعا آقا کی
نعرۂ حیدری سیکھا ہے کہاں سے ہم نے
سن لو”من کنت علی“ کی ہے صدا آقا کی
وہ ”علیکَ“ یا ”علیہِ” کے تو محتاج نہیں
شان ہر صیغے سے بڑھ کر ہے ورا آقا کی
وہ تو سنتے ہیں قرینہ ہو صدا دینے کا
ساری دنیا سے سماعت ہے جدا آقا کی
آنکھ میں اشک ہیں گودی میں حسینؑ ابنِ علیؑ
رب کی نادر ہے رضا جو وہ رضا آقا کی
ابوبکر نادر
No comments:
Post a Comment