عارفانہ کلام حمد نعت منقبت
وصف لکھتا ہوں سرِ دیوان بسم اللہ کا
لوحِ سینہ پر قلم بن کر الف اللہ کا
صفحۂ قرآن نہ کیوں رُوئے محمدؐ کو کہوں
ایسی صورت پر ہے موزوں تاج بسم اللہ کا
حُسنِ یوسفؑ یوں تِرے جلوے کا تھا پیغامبر
دو قدم رہتا ہے آگے جیسے تارا ماہ کا
ایک تنکے کے اُتارے کا بھی احساں سر پہ ہے
کوہ سے بارِ گراں رتبہ ہے اس جانکاہ کا
ماروں ٹھوکر اگر تخت شاہی مجھ کو ملے
بن کے بیٹھا ہوں گدا اب ایک شہنشاہ کا
منزلوں دشتِ طلب میں اپنے سایہ سے ہوں دور
وہ مسافر ہوں کہ جو طالب نہیں ہمراہ کا
مجھ کو خشکی اور تری کا یوں سفر درپیش ہے
آنسوؤں کا کارواں ہے اور علم ہے آہ کا
بیدم اب دل کے لگانے کا زمانہ ہی نہیں
اب تو گرنا ہے کنویں میں نام لینا چاہ کا
آفتابِ روز محشر سے بھی بیدم ہو بُلند
گاڑ دوں گر حشر کے میداں میں جھنڈا آہ کا
بیدم شاہ وارثی
No comments:
Post a Comment