عارفانہ کلام حمد نعت منقبت
ہے اس لیے دلوں میں محبت حسینؑ کی
عکس شبیہ مصطفیٰﷺ صورت حسینؑ کی
اللہ ہی جانتا ہے مقامِ حسینؑ کو
کیا پا سکے گا کوئی حقیقت حسینؑ کی
قرآں سنا رہے ہیں وہ نیزے کی نوک پر
کتنی عظیم تر ہے عبادت حسینؑ کی
لرزاں تھا جس کے خوف سے لشکر یزید کا
ایسی تھی کربلا میں شجاعت حسینؑ کی
تنہا کھڑے رہے ہیں وہ لاشوں کے درمیان
دیکھی ہے آسماں نے یہ ہمت حسینؑ کی
باطل کے سامنے نہ کبھی سر جھکائیے
دیتی ہے ہم کو درس شہادت حسینؑ کی
ہر سو جہاں میں غلبہ باطل ہے آج پھر
محسوس ہو رہی ہے ضرورت حسینؑ کی
بھیجیے سلام آلؑ محمدﷺ پر جب خدا
شاکر سے کیا بیان ہو مدحت حسینؑ کی
شاکر نظامی
No comments:
Post a Comment