عارفانہ کلام حمد نعت منقبت
خلق پر سورۂ رحمان کے اسرار کُھلیں
عشقِ شبیرؑ میں قرآن کے اسرار کھلیں
گُھٹنیوں زیست چلے صدیوں تلک تب شاید
تیر کے سامنے مُسکان کے اسرار کھلیں
دیکھ کر دیپ رخِ فوجِ حسینیؑ، بولا
کاش ناچیز پہ انسان کے اسرار کھلیں
قافلے اس لیے جاتے ہیں سُوئے کرب و بلا
خاک پر خاک کے میدان کے اسرار کھلیں
نوکِ نیزہ پہ تلاوت میں قرینہ تھا یہی
روزِ محشر تئیں یزدان کے اسرار کھلیں
سب بیاں کرتے ہیں فرمانِ حسینُ مِنِّى
ایسے دہرائیں کہ فرمان کے اسرار کھلیں
ہائے سجادؑ سوا کون جہاں میں ہو گا
جس پہ زنجیر کے زِندان کے اسرار کھلیں
رخشندہ بتول
No comments:
Post a Comment