عارفانہ کلام حمد نعت منقبت
آنگن سے جو رحمت کی ہواؤں کا گزر ہے
یہ ذکرِ نبی پاکﷺ کی برکت کا اثر ہے
اس اسم کی خوشبو سے سبھی لفظ مُعَطر
اس نام کی شبنم سے سخن یہ گُلِ تر ہے
سینے میں دھڑکتی ہوئی ان کی ہی محبت
ہر سانس یہ لگتا ہے مدینے کا سفر ہے
اب میرا تِرے سایۂ رحمت میں بسیرا
اب مجھ کو کوئی خوف نہ خدشہ نہ خطر ہے
ورنہ تو نہیں تھی تِری مدحت مِرے بس میں
یہ تیرا کرم، تیری عطا، تیری نظر ہے
حسن ظہیر راجا
No comments:
Post a Comment