خزاں سے کون سی شے چھین لی بہاروں نے
گُلوں کو آنکھ دکھائی چمن میں خاروں نے
چُھپا چُھپا کے رکھا تھا جسے بہاروں نے
اُگل دیا ہے وہی خُون لالہ زاروں نے
اسی مقام پہ پہنچے ہیں تیرے دیوانے
جہاں سے آنکھ چُرائی تھی ہوشیاروں نے
شب فراق اُمیدوں کی لو بھی کانپ اُٹھی
کچھ ایسے گیت بھی گائے ہیں چاند تاروں نے
دُعا ہے پھر بھی سلامت رہے یہ مے خانہ
عوض میں مے کے پیا خُون بادہ خواروں نے
سکوں کی بھیک تو مانگی نہ تھی کبھی میں نے
کرم کیا ہے کہاں میرے غم گُساروں نے
چبھو دئیے ہیں دلوں میں جو خار غم تم نے
انہیں سے زخم کُریدے وفا شعاروں نے
کہاں کا ذوق نظر خود نظر ہے گُم فائق
چُھپا لیا ہے مجھے یوں تِرے نظاروں نے
فائق برہانپوری
No comments:
Post a Comment