دل مست مئے جلوۂ جاناں محمد

 عارفانہ کلام حمد نعت منقبت

دل مست مئے جلوۂ جاناں محمدﷺ

آنکھوں میں ہے نورِ رخِ جاناں محمدﷺ

دل بن گیا آئینۂ حیرانِ محمدﷺ

صدقے تِرے اے جلوۂ جانانِ محمدﷺ

اللہ بچائے نظرِ کفر سے دل کو

پھر جوش میں ہے جذبۂ ایمانِ محمدﷺ

خورشیدِ قیامت ہے اگر سر پہ تو کیا غم

کافی ہے مجھے سایۂ دامانِ محمدﷺ

اللہ نے بلوا ہی لیا عرش پہ آخر

اے صلِ علیٰ مرتبہ و شانِ محمدﷺ

دل کو ہی نہیں آنکھوں کو بھی ہے حسرتِ دیدار

اے رشکِ قمر صورتِ خندانِ محمدﷺ

یہ زندہ حقیقت کوئی مانے کہ نہ مانے

اک معجزۂ خاص ہے قرآنِ محمدﷺ

انور تِرے نغموں میں بھی ہو کیوں نہ کوئی کیف

تُو بھی تو ہے اک بلبلِ بُستانِ محمدﷺ

انور بھوپالی

سید نورالدین