امید ان کی کم ہی سہی آرزو تو ہے

 امید ان کی کم ہی سہی آرزو تو ہے

منزل ہمیں ملے نہ ملے جستجو تو ہے

امرت کی آرزو نے کہو تم کو کیا دیا

ہم لوگ زہر نوش سہی آبرو تو ہے

دنیا میں ہم کچھ ایسے تہی دست بھی نہیں

اجداد کا ہماری رگوں میں لہو تو ہے

احباب کو تو مصلحت اندیشیوں سے کام

آئینہ صاف گو ہی سہی رو برو تو ہے

دیوانہ پا شکستی و شریدہ سر سہی

لیکن بپاسِ حُسنِ وفا سرخرو تو ہے

طالب یہ کیا ضرور کہ ہو ذکرِ خیر ہی

یاروں کے درمیان تری گفتگو تو ہے

طالب محمود