ہر لمحہ بخیلی ہے ہر گام پہ کوتاہی

 ہر لمحہ بخیلی ہے، ہر گام پہ کوتاہی

ہے سوچ گداگر کی ڈھونڈیں ہیں مگر شاہی

پُوچھو نہ مِری جاں کا کیا حشر ہُوا اب تک

بے آب تڑپتی ہو جیسے کہ کوئی ماہی

ہر گام پہ دیتی ہے آواز نئی منزل

سنگین ہیں گو راہیں تُو چل تو سہی راہی

اے سوزِ غمِ منزل! کچھ اور پِگھلنے دے

کچھ کام تو کر جائے یہ ذوقِ جگر گاہی

ہر مِلّتِ زِندہ کی پہچان فقط اتنی

سُولی پہ اسے رکھے ہر لمحہ خُود آگاہی

اصغر علی تبسم