سواد غم میں کہیں گوشہ اماں نہ ملا

سوادِ غم میں کہیں گوشۂ اماں نہ ملا

ہم ایسے کھوئے کہ پھر تیرا آستاں نہ ملا

یہ اتفاقِ زمانہ ہے ۔۔ اس کا رونا کیا

ملا ملا کوئی دل کا مزاج واں نہ ملا

غموں کی بزم کہ تنہائیوں کی محفل تھی

ہمیں وہ دشمنِ تمکیں کہاں کہاں نہ ملا

عجیب دورِ ستم ہے کہ دل کو مدت سے

نویدِ غم نہ ملی ۔۔ مژدۂ زیاں نہ ملا

یہ نارسائ قسمت ۔ کہ نا تمامئ شوق

بھری بہار میں بجلی کو آشیاں نہ ملا

کسے ہے یاد کہ سعی و طلب کی راہوں میں

کہاں ملا ہمیں تیرا نشاں ۔۔ کہاں نہ ملا

اِدھر وفا کو گِلہ ہے کہ دل لہو نہ ہُوا

اُدھر ستم کو شکایت کہ قدرداں نہ ملا

لبوں کا نطق کا اعجاز تو ملا تاباںؔ

مگر سکوت کا پیرایۂ بیاباں نہ ملا

غلام ربانی تاباں