زہر کی چٹکی ہی مل جائے برائے درد دل

زہر کی چٹکی ہی مل جائے برائے دردِ دل 

کچھ نہ کچھ تو چاہيے بابا دوائے دردِ دل 

رات کو آرام سے ہوں ميں نہ دن کو چين سے 

ہائے ہائے وحشتِ دل، ہائے ہائے دردِ دل

دردِ دل نے تو ہميں بے حال کر کے رکھ ديا 

کاش کوئی اور غم ہوتا۔۔۔ بجائے دردِ دل

اس نے ہم سے خيريت پوچھی تو ہم چپ ہو گئے 

کوئی لفظوں ميں بھلا کيسے بتائے دردِ دل 

دو بلائيں آج کل اپنی شريکِ حال ہيں 

اک بلائے دردِ دنيا۔۔۔ اک بلائے دردِ دل

آج کا انسان دہرا ہے خود اپنے بوجھ سے 

کيا سہے دردِ محبت، کيا اٹھائے دردِ دل

زندگی ميں ہر طرح کے لوگ ملتے ہيں شعورؔ 

آشنائے دردِ دل ۔۔۔ نا آشنائے دردِ دل

انور شعور