انتظار کے آنگن میں ایک تابوت

انتظار کے آنگن میں ایک تابوت

مِرے بابا

تمہیں معلوم ہی ہو گا

گھروں سے دور جو شامیں گزرتی ہیں

وہ کتنی زرد ہوتی ہیں

کہ تم نے ایسی شاموں کے کئی چہرے

خطوں میں ڈال کر ہم کو بھی بھیجے تھے

تمہیں معلوم ہے بابا

کہ ہم روتے ہوئے تیرے خطوں کو چوم لیتے تھے

تو تب ہم سے ہماری ماں یہ کہتی تھی

کہ اے بچو

بڑے نادان ہو تم بھی

جو اپنے باپ کے ہاتھوں

لکھے لفظوں پہ روتے ہو

ہماری ماں ہمیں کہتی کہ اے بیٹا

یہ لمحہ شکر کرنے اور دعائیں مانگنے کا ہے

کہ بچوں کی دعائیں

خدا کے ہاں بڑی مقبول ہوتی ہیں

تو تب مُنی کے ہونٹوں پر

تمہارے واسطے حرفِ دعا آتا

تو ہم کہتے

کہ اب بابا کی ساری زرد شاموں کو

نکھرتی روشنی ملنے ہی والی

سنو بابا! وہ سارے راستے جن سے

تمہیں اس روشنی کے ساتھ آنا تھا

تمہارے منتظر بچوں نے

ان میں اپنی آنکھوں کو بچھایا تھا

مگر تم اور ہی رستوں سے آئے ہو

یہ رستے تو کسی نازک گھڑی میں بھی

ہمارے وہم کو چھو کر نہیں گزرے

مرے بابا

اگر تم بعد مدت کے

ہمارے درمیاں آ ہی گئے ہو تو

یہ کیسی آنکھ لائے ہو

کہ جو بچوں کے چہرے بھی نہیں پڑھتی

یہ کیسے ہونٹ لائے ہو

جو ہم کو پھولنے پھلنے کی

اور لمبی حیاتی کی دعائیں تک نہیں دیتے

یہ کیسے ہاتھ لائے ہو

جو ہم کو تھام لینے کے لیے آگے نہیں بڑھتے

سنو بابا

سنہری شام ہوتے ہی

مسافت سے تھکی کونجیں

گھروں کو لوٹ کر آتیں

تو وہ لمحہ بڑا مانوس لگتا تھا

ہمیں محسوس ہوتا تھا

کوئی پیغام آیا ہے

سنو بابا! ہمارے منتظر گھر میں

سمندر پار دیسوں سے

کوئی جھونکا بھی آتا تھا

تو ہم کہتے تھے، ابو آ گئے ہیں

اور عجب حیرت کے عالم میں

ہم اپنے گھر کے دروازے

بنا دستک ہوئے ہی کھول دیتے تھے

مقصود وفا