دل توڑ کر وہ دل میں پشیماں ہوا تو کیا

دل توڑ کر وہ دل میں پشیماں ہُوا تو کیا

اک بے نیاز ناز پہ احساں ہوا تو کیا

اپنا علاج تنگئ دل وہ نہ کر سکے

میرا علاج تنگئ داماں ہوا تو کیا

جب بال و پر ہی نذرِ قفس ہو کے رہ گئے

صحن چمن میں شورِ بہاراں ہوا تو کیا

اک عمر رکھ کے روح مِری تشنۂ نشاط

اب نغمۂ حیات پر افشاں ہوا تو کیا

جب میرے واسطے درِ مے خانہ بند ہے

صہبا میں غرق عالمِ امکاں ہوا تو کیا

ٹوٹے پڑے ہیں سازِ محبت کے تار تار

اب شاہدِ خیال، غزل خواں ہوا تو کیا

آدم نے ایک خوشۂ گندم کو کیا کِیا

مجرم کبھی جو بھوک سے انساں ہوا تو کیا

وامق کی تیرہ بختی کا عالم وہی رہا

ظلمت کدہ میں چشمۂ حیواں ہوا تو کیا

وامق جونپوری