تو سمجھتا ہے محبت سے گزر جائے گا

تُو سمجھتا ہے محبت سے گزر جائے گا 

تُو جو نکلے گا کناروں سے تو مر جائے گا

یہ ضروری تو نہیں ہجر کے لمحات گنوں

"وقت کا کیا ہے، گزرتا ہے، گزر جائے گا"

یہ تِرے بس کا نہیں روگ، میاں چھوڑ اسے

تُو بدن چاٹ کے الفت سے مُکر جائے گا

میرے رونے سے سمندر میں اضافہ نہ سہی

کم سے کم آنکھ کا دریا تو اتر جائے گا

اے مِرے عکسِ جنوں دیکھ مرے چہرے کو

تُو بھی خاموش رہے گا تو بکھر جائے گا

قیس کو قیس نما، اور مجھے قیس کہا

میں نہ کہتا تھا مجھے دیکھ کے ڈر جائے گا

محسن احمد