سوائے میرے ترے میکدے میں کوئی نہیں

 سوائے میرے تِرے مے کدے میں کوئی نہیں

خمار میں تو سبھی ہیں نشے میں کوئی نہیں

میں ایک شخص محبت کے شہر میں تنہا

کہ عمر گزری مِرے قافلے میں کوئی نہیں

وفا کی راہ پہ چلنے کو آ گئے وہ بھی

انہیں خبر ہی نہیں راستے میں کوئی نہیں

یہ زندگی کا سفر امتحان ہے صاحب

سبھی گزار رہے ہیں، مزے میں کوئی نہیں

وجودِ حسرتِ انسان ایک دھوکہ ہے

"سوائے عکس کسی آئینے میں کوئی نہیں"

ہنسی یہ میری اسی واسطے ہے پاگل پن

کہ میرے ساتھ مِرے قہقہے میں کوئی نہیں

تجھے کبھی بھی میں شاہد بھلا نہیں سکتا

تِرے بغیر مِرے حافظے میں کوئی نہیں

شاہد عباس