ہم سے اب دل کی حمایت بھی نہیں ہوتی ہے
اِس محبت سے بغاوت بھی نہیں ہوتی ہے
اب تو وہ میرے بِنا بھی سدا خوش رہتا ہے
اب اُسے میری ضرورت بھی نہیں ہوتی ہے
جس کے دو چار جہاں بھر میں نہ دشمن ہوں میاں
ایسے لوگوں کی تو عزت بھی نہیں ہوتی ہے
پہلے کرتے تھے کبھی اُن سے شکایت ہم بھی
اب تو ہم سے یہ جسارت بھی نہیں ہوتی ہے
لوگ رکھتے ہیں ضرورت کے مطابق رشتے
بے وفاؤں کو نِدامت بھی نہیں ہوتی ہے
کون کرتا ہے یوں بے لوث وفائیں اب کے
اب کسی شخص میں ہمت بھی نہیں ہوتی ہے
اب تو نفرت کا بھی یہ لوگ صِلہ مانگتے ہیں
اور یک طرفہ محبت بھی نہیں ہوتی ہے
عجیب ساجد
No comments:
Post a Comment