تو مقتدر ہے سو تیری ہوا بنی ہوئی ہے

تُو مقتدر ہے سو تیری ہوا بنی ہوئی ہے 

یہ تیرے شہر کی بے حس فضا بنی ہوئی ہے 

خبر نہیں ہے کہ وجہِ مخاصمت کیا ہے؟؟ 

کہ اس کی مجھ سے تو نامِ خدا بنی ہوئی ہے

ہمارے ہاتھ میں کچھ بھی نہیں خدا کی قسم

بس اک انا ہے سو اپنی ردا بنی ہوئی ہے 

تمہارے سُر میں ملاتے ہیں سارے سُر اپنا

تو ساری بزم، تیری ہمنوا بنی ہوئی ہے

کبھی تو ان کے بھی دن رات دیکھ کر آؤ

کہ زندگی بھی جنہیں اک سزا بنی ہوئی ہے

یہاں تو سانس بھی لینا محال ہو گیا ہے

یہ کیسی شہر کی آب و ہوا بنی ہوئی ہے

کسی کی یاد بھلے دردناک ہے اشکر

پر اپنے دل کے لیے تو دوا بنی ہوئی ہے

اشکر فاروقی