نغمہ ترا نفس نفس جلوہ ترا نظر نظر

 نغمہ تِرا نفس نفس، جلوہ تِرا نظر نظر

اے میرے شاہدِ حیات اور ابھی قریب تر

تِرا خلوصِ دلبری جان نہ ڈال دے اگر

نالہ بھی میرا مضمحل نغمہ بھی میرا بے اثر

معرفتِ جمال میں کام نہ آئے بال و پر

عقل کہیں پہ گر پڑی چھوٹ گئی کہیں نظر

با ہمہ ذوقِ آگہی،۔ ہائے رے پستئ بشر

سارے جہاں کا جائزہ، اپنے جہاں سے بے خبر

آ مِری جانِ انتظار،۔ آ مِرے آفتابِ شوق

تیرے بغیر زندگی کب سے ہے شامِ بے سحر

لاکھ بیان دردِ دل،۔ اک وہ تبسمِ حزیں

لاکھ فسانہ ہائے شوق اک وہ نگاہِ مختصر

حسن سے جو نہ ہو سکا کر گئی حسن کی اک آہ

عشق نے توڑ دی کمان، عقل نے ڈال دی سِپر

جگر مراد آبادی