تجھ پر مری رسوائی کا الزام تو ہے نا

 تجھ پر مِری رسوائی کا الزام تو ہے نا

دل توڑنے والوں میں تِرا نام تو ہے نا

کہتے ہیں اداسی کا سبب کوئی تو ہو گا

کچھ بھی نہ ہو اک سلسلۂ شام تو ہے نا

یونہی تو نہیں رہتیں افق پر مِری آنکھیں

وہ ماہِ ہنر تاب سرِ بام تو ہے نا

میں کوئی قلندر ہوں کہ تقدیر پہ چھوڑوں

درپے ہے اگر گرشِ ایام تو ہے نا

میں شب میں چراغ ایسا کہ ظلمت مِری لو سے

کچھ دم تو سہی لرزہ بر اندام تو ہے نا

ممکن ہی نہیں موت مجھے مار دے اختر

میں صاحبِ معنیٰ ہوں مِرا کام تو ہے نا

اختر عثمان